conto pidarta basa bali

Bapak Kepala Sekolah sane dahat wangiang titiang

Bapak-bapak miwah Ibu-ibu Guru sane wangiang titiang

Para Staf miwah Pegawai sane wangiang titiang

Miwah Para semeton sisiane sami sane tresnasihin titiang

Angayubagia uningayang titiang majeng ring Ida Sang Hyang Widhi Wasa, duaning sangkaning paswecan Ida mawinan titian prasida kacunduk ring Ida-dane sareng sami sekadi mangkin. Antuk punika ngiring sinarengan ngojarang pangastungkara/panganjali umat

Om Suastiastu

Ida-dane Sameton Sinamian sane Wangiang Titiang

Manut baos sang maraga pawiku, umat Hindune astiti bhakti ring Ida Hyang Widhi sane kabaos maraga Sang Hyang Tunggal. Sakewanten sang maraga wicaksana maosang antuk makudang-kudang parinama. Sinalih tunggil parinamannyane sane kaanggen pinaka Dewa Pencipta Ilmu Pengetahuan ketah kabaos Ida Sasuhunan Sang Hyang Aji Saraswati.

Manut daging kacaping sastra aji agama, Umat Hindunne nyanggra piodalan Saraswati ngenem sasih apisan inggih punika nemonin rahina Saniscara Umanis Wuku Watugunung. Punika kaanggen pinaka rahina pamijilan pangweruh utawi Hari Lahirnya Ilmu Pengetahuan. Ring rahina punika makasami umah Hindunne kapatut ngaturang pangubakti ring Ida Sang Hyang Widhi pinaka utpeti utawi pencipta ilmu pengetahuan. Yadian sang maraga dokter, guru, murid, petani, bingkil, miwah sane lianan makasami patut sareng nyanggra piodalan Saraswati riantuk makasami madue pangweruh miwah kawagedan sane kapaica olih Ida Sang Hyang Aji Saraswati.

Ida-dane sareng sami

Tatujon nyanggra rahina piodalan puniki nenten ja tios wantah ngaturang parama suksma ring Hyang Widhi santukan Ida sueca mapaica pangweruh ring pretakjana Hindunne saha mangda sida nglantur pasuecan-Ida gumanti wenten anggen ngruruh pangupajiwa. Riantuk utama pisan kawigunan kaweruhane majeng ring kahuripan druene, punika mawinana ilmu pengetahuanne kaniyasa utawi kalambangin antuk Dewi Saraswati.

Ring kacapin sastra “Sarasamuscaya” wenten kaunggahang mungguwing anake sane nenten madue kaweruhan tan pendah kadi anak buta. Kaweruhan kocap pacang prasida pinaka titi pangancan miwah pinaka gagamelan sane pacang prasida ngaterang imanusa ngicalang kasengsaran uripnyanne. Punika mawinan nenten wenten anake nyadia dados anak belog utawi tambet. Makasami mapangapti mangda kasidan dados anak wikan utawi ririh. Majanten mangda setata jemet melajahang raga saha nenten lali satata ngastiti bhakti ring Ida Sang Hyang Widhi Wasa, mamuja Ida Sang Hyang Aji Saraswati. Patut prasida nganutin tatwa ajaran Brahmacari Arsana : menuntut ilmu setinggi-tingginya dengan pengendalian nafsu birahi. Sajaba punika taler patut ngelingang slogan “masa muda masa belajar”.

Titiang naenan miragi gatra mungguing meseh I manusa sane utama wantah katambetan utawi kebodohan. Nenten pisan wenten nandingin saktin katambetane punika. Duaning asapunika anake sane kaliput dening katambetan majanten pacang akehan maparilaksana sane dudu utawi nenten rahayu. Yening wenten anak wikan maparilaksana sakadi anak tambet, janten dados ipun kabaos anak belog. Wenten malih kacaping sastra sane maosang mungguwing wiwit suka-dukane wantah katambetan. Katambetan punika wetu saking kaloban, taler loba punika matu saking katambetan. Dados ipun wantah katambetan jatinnyane sane mawinan manusane mangguh sengsara.

Ida-dane Sameton Sinamian sane Wangiang Titiang

Kadi asapunika titian prasida maatur-atur ring galahe sane becik puniki. Maka kirang langkung atur titiang, nenten lali titian nglungsur gung rena sinampura. Dumogi sangkaning sih Ida Sang Hyang Widhi Wasa mawinan punapi-punapi sane aturang titian I wawu wenten pakenohnyane. Inggih pacang puputang titian antuk parama santih.

Om Santih, Santih, Santih Om